Cəbrayılın coğrafi mövqeyi onun bərpa prosesini yalnız yerli iqtisadi məsələ kimi nəzərdən keçirməyə imkan vermir. Rayon Şərqi Zəngəzurun cənub hissəsində yerləşir və “Araz Vadisi İqtisadi Zonası” Sənaye Parkının yaradılması ilə burada sənaye və logistika fəaliyyətinin inkişaf etdirilməsi üçün ayrıca iqtisadi platforma formalaşdırılıb.
Sənaye parkının yaradılması haqqında Prezident fərmanında Cəbrayılın cənub istiqamətində giriş qapısı mövqeyi, logistika mərkəzinin yaradılması və müxtəlif xidmət və innovativ sənaye sahələrinin inkişaf etdirilməsi imkanları qeyd olunur. Bu yanaşma rayonun iqtisadi fəaliyyətinin daha geniş regional sistemlə əlaqələndirilməsini nəzərdə tutur.
Regional iqtisadi inteqrasiya üçün nəqliyyat infrastrukturu xüsusi əhəmiyyət daşıyır. Müasir yolların, dəmir yollarının və logistika mərkəzlərinin yaradılması məhsulların, xammalın və xidmətlərin hərəkətini asanlaşdırır. Bu amil sənaye müəssisələrinin fəaliyyətinin Cəbrayılın hüdudlarından kənarda bazarlara çıxış imkanlarına da təsir göstərə bilər.
İqtisadi inteqrasiyanın digər tərəfi əmək bazarıdır. Cəbrayılda sənaye, kənd təsərrüfatı, logistika və xidmət sahələrinin inkişafı yerli əhali üçün müxtəlif məşğulluq imkanları yarada bilər. Bu isə qayıdış prosesinin sosial dayanıqlığı baxımından mühüm amildir.
Beləliklə, Cəbrayılın iqtisadi bərpası həm rayon daxilində yeni istehsal və xidmət sahələrinin yaradılmasını, həm də rayonun daha geniş iqtisadi əlaqələr sisteminə qoşulmasını əhatə edir. “Araz Vadisi” Sənaye Parkının institusional çərçivəsi bu istiqamətdə mühüm layihələrdən biridir.
Aytən İsmayılova,
YAP Nizami rayon təşkilatının fəalı
