Azərbaycanın müstəqil dövlət kimi mövcudluğu və inkişafı çoxəsrlik tariximizin ən böyük nailiyyətlərindən biridir. Lakin bu müstəqilliyin qorunması və möhkəmləndirilməsi heç də asan başa gəlməyib. 1991-ci ildə dövlət müstəqilliyimizi yenidən bərpa etdikdən sonra Azərbaycan daxildən və xaricdən ciddi təzyiqlərlə qarşılaşdı. Ermənistanın işğalçılıq siyasəti, daxili siyasi çəkişmələr, vətəndaş qarşıdurması, iqtisadi gerilik və rəhbərlikdəki qeyri-sabitlik ölkəni fəlakətə sürükləyirdi. Məhz belə bir ağır məqamda xalqın təkidli tələbi ilə siyasi hakimiyyətə qayıdan Ulu Öndər Heydər Əliyev Azərbaycanı parçalanmaqdan və dövlətçiliyin süqutundan xilas etdi.
Heydər Əliyevin siyasi iradəsi, milli maraqlara sadiqliyi və fədakarlığı onun rəhbərliyinin ilk günlərindən etibarən özünü göstərdi. Ölkədə sabitlik və asayiş bərpa olundu, separatçı meyillərə son qoyuldu, hüquqi dövlət quruculuğu istiqamətində ciddi addımlar atıldı. 1995-ci ildə qəbul edilən Konstitusiya ilə Azərbaycan hüquqi, demokratik və dünyəvi dövlət yolu ilə inkişaf etməyə başladı. Ulu Öndərin həyata keçirdiyi neft strategiyası ölkənin iqtisadi gələcəyini təmin etdi, beynəlxalq investisiyalar cəlb olundu və Azərbaycan regionun enerji təhlükəsizliyində əsas aktorlardan birinə çevrildi.
Ulu Öndər Heydər Əliyevin ən böyük xidmətlərindən biri də milli həmrəyliyin və vətəndaş birliyinin yaradılması oldu. O, xalqa inandı və xalqa güvən verdi. Onun “Mən hər bir azərbaycanlının Prezidenti olacağam” ifadəsi bu gün də xalqın yaddaşında qürurla yaşamaqdadır. Ulu Öndərin rəhbərliyi ilə dövlət institutları formalaşdı, ordu quruculuğu başladı, təhsil və mədəniyyət sahələrinə xüsusi diqqət yetirildi. Azərbaycan beynəlxalq aləmdə etibarlı tərəfdaş kimi tanındı və nüfuz qazandı.
Bu gün Azərbaycanın əldə etdiyi uğurların təməlində məhz Heydər Əliyev dühasının qoyduğu möhkəm əsaslar dayanır. Onun siyasi kursu hazırda Prezident İlham Əliyev tərəfindən uğurla davam etdirilir. 2020-ci ildə torpaqlarımızın işğaldan azad olunması ilə nəticələnən Vətən müharibəsi Ulu Öndərin “Azərbaycanın gələcəyi güclü dövlətdir” fikrini təsdiqlədi.
Nəticə etibarilə, Azərbaycanın müstəqil dövlət kimi yaşaması, möhkəmlənməsi və inkişafı birbaşa olaraq Heydər Əliyevin uzaqgörən siyasəti, möhkəm siyasi iradəsi və fədakar xidmətləri ilə bağlıdır. O, müstəqilliyimizin memarı, dövlətçiliyimizin xilaskarı kimi tariximizdə əbədiyaşar lider olaraq qalacaq.
Sevinc Qəhrəmanova ,
Yeni Azərbaycan Partiyası,məsləhətçi
