
Azərbaycan Respublikasının Prezidenti İlham Əliyevin noyabrın 12-də İrlandiyanın paytaxtı Dublin şəhərinə həyata keçirdiyi səfər beynəlxalq miqyasda böyük əks-səda doğurmuşdur.
Səfər çərçivəsində baş tutan ən mühüm tədbirlərdən biri Böyük Britaniya və Şimali İrlandiya Birləşmiş Krallığının Baş naziri Endi Börnhem ilə keçirilən ikitərəfli görüş olmuşdur. Bu görüş iki ölkə arasındakı münasibətlərin inkişafında yeni və keyfiyyətcə fərqli bir mərhələnin təməlini qoymuşdur.
Görüşün əvvəlində “Azərbaycan Respublikası ilə Böyük Britaniya və Şimali İrlandiya Birləşmiş Krallığı arasında Strateji Tərəfdaşlıq haqqında Birgə Bəyannamə” rəsmi şəkildə mübadilə olunmuşdur. İmzalanan bu mühüm sənəd dövlətlərarası münasibətlərin hüquqi və siyasi bazasını daha da möhkəmləndirmişdir.
Baş nazir Endi Börnhem Azərbaycan Prezidentini Dublin şəhərində səmimiyyətlə salamlayaraq səfərin əhəmiyyətini yüksək qiymətləndirmişdir. Öz növbəsində, Prezident İlham Əliyev qonaqpərvərliyə görə təşəkkürünü bildirərək Birləşmiş Krallıq ilə əlaqələrə verilən önəmi vurğulamışdır. Liderlər iki ölkə arasında onilliklər boyu formalaşan dostluq və qarşılıqlı etimad mühitinin qürurverici olduğunu qeyd etmişlər.
Siyasi dialoqun inkişaf etdirilməsi məsələsi danışıqların əsas leytmotivini təşkil etmişdir. Tərəflər dövlət başçılarının və hökumət nümayəndələrinin qarşılıqlı səfərlərinin intensivləşdirilməsinin vacibliyini dilə gətirmişlər. Parlamentlərarası əlaqələrin gücləndirilməsi və deputat qruplarının fəaliyyətinin genişləndirilməsi də müzakirə olunan mövzular arasında idi. Xarici işlər nazirlikləri arasında müntəzəm məsləhətləşmələrin keçirilməsi ikitərəfli münasibətlərin koordinasiyasını artırır.
Birləşmiş Krallıq Azərbaycanın müstəqilliyini bərpa etdiyi ilk illərdən etibarən ölkəmizin etibarlı tərəfdaşlarından biri olmuşdur. Bu illər ərzində siyasi sabitlik və suverenlik prinsiplərinə hörmət əsasında qurulan əməkdaşlıq daim dərinləşmişdir.
Strateji Tərəfdaşlıq haqqında Birgə Bəyannamə bu əməkdaşlığın gələcək onilliklər üçün yol xəritəsini müəyyən edir. Sənəd həmçinin beynəlxalq hüququn norma və prinsiplərinə sadiqliyi bir daha nümayiş etdirir. Dublin görüşü zamanı beynəlxalq təşkilatlar çərçivəsində dəstək və həmrəylik məsələlərinə xüsusi diqqət yetirilmişdir.
BMT, Avropa Şurası və digər nüfuzlu platformalarda qarşılıqlı maraq doğuran məsələlər ətrafında sıx əməkdaşlıq davam etdiriləcəkdir. Azərbaycanın qlobal təhlükəsizlik arxitekturasına verdiyi töhfələr Birləşmiş Krallıq tərəfindən həmişə yüksək qiymətləndirilmişdir.
Baş nazir Endi Börnhem Azərbaycanın regional sabitliyin qorunmasındakı rolunu xüsusilə vurğulamışdır. Prezident İlham Əliyev isə Birləşmiş Krallığın qlobal sülh prosesindəki mühüm mövqeyini qeyd etmişdir.
İkitərəfli münasibətlərin inkişafında ictimai diplomatiyanın və vətəndaş cəmiyyəti institutlarının rolu da diqqətdən kənarda qalmamışdır. Hər iki ölkənin xalqları arasında mədəni bağların möhkəmlənməsi dövlətlərarası münasibətlərin təməlini daha da gücləndirir.
Görüşdə təhlükəsizlik sahəsində kəşfiyyat və təcrübə mübadiləsinin aparılması imkanları nəzərdən keçirilmişdir. Kibertəhlükəsizliklə mübarizə və rəqəmsal sərhədlərin qorunması sahəsində birgə layihələrin həyata keçirilməsi qərara alınmışdır.
Dövlət başçısı Azərbaycanın həyata keçirdiyi islahatlar barədə ətraflı məlumat vermişdir. İdarəetmə sisteminin təkmilləşdirilməsi və şəffaflığın artırılması istiqamətində görülən işlər britaniyalı həmkarların marağına səbəb olmuşdur.
Baş nazir Endi Börnhem Azərbaycanın qısa müddət ərzində əldə etdiyi inkişaf dinamikasını təqdirəlayiq hesab etmişdir. Görüşün yekununda aidiyyəti qurumlara imzalanmış Bəyannamədən irəli gələn vəzifələrin icrası ilə bağlı konkret tapşırıqlar verilmişdir. Bu mühüm sənədin həyata keçirilməsi üçün birgə işçi qruplarının yaradılması nəzərdə tutulur. Siyasi məsləhətləşmələrin növbəti mərhələsinin Bakı şəhərində keçirilməsi planlaşdırılır.
Dublin görüşü iki ölkə arasında etimad mühitinin ən yüksək səviyyədə olduğunu sübut etdi. Prezident İlham Əliyevin bu səfəri Azərbaycanın xarici siyasətində Avropa istiqamətinin nə qədər prioritet olduğunu bir daha göstərdi.
Zəhra Əzimzadə,
Nizami rayonunun fəal gənci, ADA-nən 2-ci kurs tələbəsi



