Cəbrayılın azad edilməsinin siyasi əhəmiyyətini artıran mühüm amillərdən biri rayonun Xudafərin kimi tarixi məkanları özündə birləşdirməsidir. 2020-ci il noyabrın 16-da Prezident İlham Əliyevin Cəbrayıl rayonuna səfəri zamanı Xudafərin körpüsündə Azərbaycan bayrağının qaldırılması Zəfər tarixinin ən yaddaqalan simvollarından birinə çevrildi. Bu hadisə hərbi qələbənin milli tarix və dövlətçilik anlayışları ilə əlaqələndirilməsi baxımından xüsusi əhəmiyyət daşıyırdı.
Xudafərin körpüləri yalnız memarlıq abidəsi deyil, Azərbaycanın qədim tarixi və regionun tarixi əlaqələri baxımından əhəmiyyətli mədəni irs nümunəsidir. İşğal dövründə bu tarixi məkanın Azərbaycan dövlətinin nəzarətindən kənarda qalması milli yaddaş baxımından xüsusi ağrılı məsələ idi. Bayrağın burada qaldırılması həmin məkanda Azərbaycan dövlət atributunun bərpasını nümayiş etdirən siyasi simvol oldu.
Prezident İlham Əliyevin Xudafərin istiqamətinə səfəri dövlət rəhbərliyinin azad edilmiş ərazilərə münasibətinin praktiki ifadələrindən biri idi. Səfər zamanı Cəbrayıl şəhərinin vəziyyətinin yerində görülməsi, tarixi obyektlərin vəziyyətinin qiymətləndirilməsi və gələcək quruculuq perspektivlərinin gündəmə gətirilməsi postmüharibə siyasətinin əsas istiqamətlərini göstərirdi.
Xudafərin amili Cəbrayılın geosiyasi əhəmiyyətini də artırır. Rayon İranla dövlət sərhədinə yaxın ərazidə yerləşir və mühüm nəqliyyat-kommunikasiya istiqamətləri ilə əlaqəlidir. Bu səbəbdən Cəbrayılın azadlığı Azərbaycanın cənub istiqamətində dövlət sərhədlərinə nəzarətin və regional nəqliyyat imkanlarının genişlənməsi baxımından da mühüm nəticə yaratdı.
Bu gün Xudafərin və Cəbrayıl birlikdə Azərbaycanın Zəfər salnaməsində tarixi yaddaşla müasir dövlətçilik arasında əlaqəni ifadə edən məkanlardır. Bayrağın qaldırıldığı məkanın sonradan yenidən canlandırılması, yolların və infrastrukturun yaradılması keçmişlə gələcək arasında siyasi və sosial bağın formalaşdırılmasına xidmət edir.
Sona Bəylərli,
YAP Nizami rayon təşkilatının “Qara Qarayev prospekti, 84” ərazi partiya təşkilatının sədr müavini
