Müstəqil Azərbaycan bu gün beynəlxalq münasibətlər sistemində öz mövqeyi, milli maraqları və müstəqil siyasəti ilə seçilən dövlətlərdən biridir. Üçrəngli Dövlət Bayrağımız ölkəmizin beynəlxalq nüfuzunu və suverenliyini təmsil edən əsas rəmzdir. Onun müxtəlif beynəlxalq tədbirlərdə dalğalanması Azərbaycanın dünya birliyindəki yerini nümayiş etdirir.
Müstəqilliyin bərpasından sonra Azərbaycan xarici siyasət əlaqələrini genişləndirmiş, beynəlxalq təşkilatlarla əməkdaşlığını inkişaf etdirmişdir. Ölkəmizin BMT-yə üzv olması və digər beynəlxalq platformalarda fəal iştirakı müstəqil dövlət kimi mövqeyinin möhkəmlənməsinə şərait yaratmışdır. Bu prosesdə dövlət bayrağımız Azərbaycanın rəsmi simvolu kimi mühüm rol oynamışdır.
Azərbaycanın beynəlxalq tədbirlərə ev sahibliyi etməsi ölkəmizin nüfuzunun artmasına töhfə vermişdir. İdman yarışları, mədəniyyət festivalları, iqtisadi forumlar və humanitar tədbirlər vasitəsilə Azərbaycan dünyaya öz potensialını nümayiş etdirir. Bu tədbirlərdə üçrəngli bayrağımızın dalğalanması milli qürur hissini gücləndirir.
Ölkəmizin diplomatik nümayəndəlikləri Azərbaycan dövlətinin maraqlarını xaricdə təmsil edir. Bu nümayəndəliklərin binalarında dalğalanan bayraq müstəqilliyimizin, dövlət suverenliyimizin və milli kimliyimizin rəmzidir. Xaricdə yaşayan soydaşlarımız üçün də bu bayraq Vətənlə mənəvi bağlılığın ifadəsidir.
Azərbaycanın beynəlxalq nüfuzunun qorunması və artırılması hər bir vətəndaşın məsuliyyətidir. Ölkəmizin uğurlarına töhfə vermək, milli dəyərlərimizi tanıtmaq və dövlət maraqlarını layiqincə təmsil etmək vacibdir. Üçrəngli bayrağımız dünyanın hər yerində Azərbaycan adını qürurla yaşatmalıdır.
Həqiqət Gülalıyeva,
YAP Nizami rayon təşkilatının “Qara Qarayev prospekti, 73b” ərazi partiya təşkilatının sədri
