Azərbaycan və Vyetnam arasında iqtisadi-ticari əməkdaşlıq sahəsində enerji sektoru xüsusi əhəmiyyət daşıyır. Hər iki ölkənin enerji resurslarına olan marağı və bu sahədəki təcrübəsi, neft sənayesində qarşılıqlı fəaliyyət üçün əlverişli zəmin yaratmışdır. Neft-qaz sənayesi həm Azərbaycanın iqtisadiyyatında, həm də Vyetnamın sənaye inkişafında aparıcı sahələrdən biridir. Bu baxımdan, iki ölkə arasında neft sahəsindəki əməkdaşlıq strateji xarakter daşıyır.
Azərbaycan Dövlət Neft Şirkəti (SOCAR) ilə Vyetnamın dövlət neft-kimya şirkəti olan Binh Son Refining and Petrochemical Joint Stock Company (BSR) arasında əməkdaşlıq ilk dəfə 2019-cu ildə rəsmi şəkildə sənədləşdirilmişdir. Bu əməkdaşlıq çərçivəsində təcrübə və texnologiya mübadiləsi, həmçinin neft emalı və təchizatı sahələrində birgə layihələrin icrası planlaşdırılmışdır. SOCAR-ın uzunmüddətli neft emalı təcrübəsi və yüksək ixtisaslı kadr potensialı, Vyetnamın sənaye modernizasiyası prosesinə dəstək məqsədilə əhəmiyyətli rol oynaya bilər.
2024-cü ildə Azərbaycan və Vyetnam arasında ticarət dövriyyəsi 223,93 milyon ABŞ dolları təşkil etmiş və bu göstərici neft sektoru daxil olmaqla, müxtəlif iqtisadi sahələrdə əməkdaşlıq potensialının artdığını göstərmişdir. Prezident İlham Əliyev 2025-ci ilin mayında Vietnam News Agency-ə verdiyi müsahibədə bu məsələyə toxunaraq bildirmişdir ki, enerji sektorunda daha geniş əməkdaşlıq imkanları mövcuddur və tərəflər bu istiqamətdə fəal dialoq aparırlar.
Neft sahəsində əməkdaşlıq, yalnız xammal ticarəti ilə məhdudlaşmır. Azərbaycanın SOCAR-ın qlobal layihələrdə iştirakı və neft emalı zavodlarının yenidən qurulması üzrə təcrübəsi, Vyetnam üçün xüsusilə cəlbedici ola bilər. Eyni zamanda, Vyetnam tərəfi də Asiya-Sakit Okean regionunda genişləndirmək istədiyi fəaliyyətlərdə Azərbaycanla əməkdaşlığı dəyərli hesab edir.
Bu əməkdaşlıq, təkcə iki ölkənin iqtisadi maraqlarına deyil, həm də enerji təhlükəsizliyi, texnoloji modernizasiya və regional əməkdaşlıq baxımından strateji üstünlüklər qazandıra bilər. Həm SOCAR, həm də BSR şirkətləri qarşılıqlı maraqları əsasında ortaq layihələr icra etməklə yanaşı, gələcəkdə üçüncü ölkələrdə də birgə fəaliyyət göstərə bilərlər.
Beləliklə, Azərbaycan və Vyetnamın neft sahəsindəki qarşılıqlı fəaliyyəti, yalnız bu günün deyil, həm də gələcəyin əməkdaşlıq modelinə çevrilmək potensialına malikdir.
Sevinc Qəhrəmanova ,
Yeni Azərbaycan Partiyası,məsləhətçi
