Füzuli rayonu Azərbaycanın cənub-qərbində yerləşir və Qarabağ bölgəsinin strateji əhəmiyyətli ərazilərindən biri kimi tanınır. Cəbrayıl, Ağdam, Xocavənd və İranla sərhəd olan bu rayon tarixi və mədəni zənginliyi ilə seçilir. Müxtəlif təbii ehtiyatları, bərəkətli torpaqları ilə yanaşı, rayonda qədim tarixi-dini abidələr də çoxdur. Bunlar arasında orta əsrlərə aid məscidlər, türbələr və digər dini qurğular xüsusi yer tutur. Bütün bu mədəni irs xalqımızın tarixini yaşadan dəyərli miras hesab edilir. Füzuli 1993-cü ildə Ermənistanın işğalına məruz qalmış, bu müddət ərzində minlərlə sakini doğma torpaqlarından məcburi köçkün olmuşdur. İşğal dövründə Füzuli rayonunun tarixi abidələri, məscidləri dağıdılmış və bəşəriyyətin mədəni irsinə zərər vurulmuşdur. Ərazilər, təəssüf ki, ciddi şəkildə minalanmış və yaşayış infrastrukturu tamamilə məhv edilmişdir. İşğaldan azad olunan Füzulidə isə bu minaların çoxluğu ən ciddi maneələrdən biridir, çünki rayon azad edilmiş ərazilər arasında ən çox çirkləndirilmiş ərazi kimi tanınır. 2020-ci ildə Vətən müharibəsi zamanı Füzuli rayonu Azərbaycan Ordusu tərəfindən işğaldan azad edildi. Qəhrəman hərbçilərimizin qətiyyətli fəaliyyəti nəticəsində bu tarixi torpaqlarımız yenidən ölkəmizin nəzarətinə keçdi. Hərbi əməliyyatların hədəfi yalnız əraziləri azad etmək deyil, həm də düşmənin mövqelərini darmadağın etmək idi. Bu əməliyyatlara görə Prezident İlham Əliyev “Füzulinin azad olunmasına görə” medalı təsis edərək, burada xidmət göstərən qəhrəman əsgər və zabitlərimizi təltif etmişdir. Bu medal, azad olunmuş torpaqlarda göstərilən fədakarlıqların dövlət səviyyəsində yüksək qiymətləndirilməsi kimi xüsusi əhəmiyyətə malikdir. Füzuli azad edildikdən sonra Böyük Qayıdış Proqramı çərçivəsində yenidənqurma işlərinə başlanıldı. Məqsəd bu ərazilərə doğma sakinlərin qayıdışını təmin etmək və Füzulini Azərbaycanın mühüm bir hissəsinə çevirməkdir.
Prezident İlham Əliyev, Müzəffər Ali Baş Komandan kimi, azad olunmuş ərazilərə bir neçə dəfə səfər edərək yenidənqurma işlərinə nəzarət etmiş, rayonun yenidən qurulması üçün ciddi tapşırıqlar vermişdir. Füzuli hava limanı, yeni yollar və digər infrastruktur obyektləri, həm təhlükəsizlik, həm də iqtisadi inkişaf baxımından bölgənin gələcəyinə böyük töhfələr verəcək. Bu gün, Füzuli Şəhəri Günü qeyd edərkən, bu ərazinin azadlığı uğrunda canlarını fəda edən şəhidlərimizi dərin hörmətlə yad edirik. Azad Füzuli, Azərbaycan üçün yalnız bir coğrafi məkan deyil, eyni zamanda yenidən dirçəlişin, əzmkarlığın və vətənpərvərliyin simvoluna çevrilmişdir. Prezident İlham Əliyev, Füzuliyə səfərləri zamanı bölgədəki dəyişikliklərə və yeniliklərə birbaşa nəzarət edir, yeni layihələrin icrası üçün təlimatlar verir. Azad Füzuli, həm də gələcəkdə iqtisadi inkişaf mərkəzlərindən biri olaraq nəzərdə tutulur və bu istiqamətdə investisiyalar davam etdirilir. İşğaldan azad olunmuş digər bölgələrdə olduğu kimi, Füzulidə də minalardan təmizləmə işləri davam edir və bu, qayıdış prosesində mühüm addım olaraq qəbul edilir. Qısa müddət ərzində həyata keçirilən böyük yenidənqurma işləri, dövlətin Qarabağa xüsusi diqqətinin bir sübutudur. Füzuli Şəhəri Günü münasibətilə xalqımız bu ərazilərin azad olunması uğrunda göstərilən fədakarlığı qürurla yad edir, bölgənin gələcəyinə böyük ümidlər bəsləyir.
Sahil Əliyev,
YAP-ın gənc fəalı
