Zəngilanın dirçəlişi Azərbaycanın inkişaf strategiyasının tərkib hissəsidir
Zəngilanın işğaldan azad olunması Azərbaycanın müasir tarixində mühüm dönüş nöqtələrindən biridir. 2020-ci il oktyabrın 20-də şəhərin azad edilməsi uzun illər doğma yurdlarından ayrı düşmüş insanların qayıdışına yol açdı. Bu gün Zəngilanın yenidən qurulması qazanılmış tarixi qələbənin davamı və ölkəmizin gələcəyə yönəlmiş inkişaf strategiyasının mühüm istiqamətidir.
Prezident İlham Əliyevin rəhbərliyi ilə azad edilmiş ərazilərdə genişmiqyaslı bərpa və quruculuq işləri aparılır. Bu siyasətin əsas məqsədi dağıdılmış yaşayış məntəqələrini yenidən qurmaq, müasir infrastruktur yaratmaq və insanların doğma torpaqlarda təhlükəsiz, rahat həyat sürməsinə şərait yaratmaqdır. Zəngilan bu prosesdə xüsusi əhəmiyyətə malik rayonlardan biridir.
Rayonda yolların çəkilməsi, yaşayış sahələrinin salınması, enerji və kommunikasiya sistemlərinin yaradılması inkişafın əsasını təşkil edir. Zəngilan Beynəlxalq Hava Limanının istifadəyə verilməsi rayonun nəqliyyat imkanlarını genişləndirən mühüm hadisədir. Ağalı kəndində həyata keçirilən “ağıllı kənd” layihəsi isə müasir yaşayış modelinin tətbiqinə nümunədir.
Zəngilanın inkişafı yalnız tikinti layihələri ilə məhdudlaşmır. Rayonun iqtisadi potensialının üzə çıxarılması, yeni iş yerlərinin yaradılması, təhsil və səhiyyə xidmətlərinin təşkili də vacib məsələlərdəndir. Bu sahələrin paralel inkişafı sakinlərin qayıdışını davamlı edir və bölgədə sosial rifahın yüksəlməsinə kömək göstərir.
Zəngilanın dirçəlişi Azərbaycanın gücünü, quruculuq əzmini və gələcəyə inamını əks etdirir. Prezident İlham Əliyevin rəhbərliyi ilə həyata keçirilən layihələr rayonun müasir və inkişaf etmiş yaşayış məkanına çevrilməsinə xidmət edir. Zəngilan Şəhəri Günü bu tarixi yolun əhəmiyyətini bir daha xatırladır.
Sevda Cabbarova,
YAP Nizami rayon təşkilatının “Babək prospekti, 75” ərazi partiya təşkilatının sədr müavini
