1992-ci il 21 noyabrda Yeni Azərbaycan Partiyasının təsis konfransı ölkəmizin müasir siyasi tarixində dönüş nöqtəsi oldu. Bu tarixi hadisə Azərbaycanın müstəqillik dövründə çətin sınaqlardan keçərək güclü dövlət quruculuğuna doğru atdığı mühüm addımlardan biri idi. Yeni Azərbaycan Partiyası, xalqın ehtiyaclarını, dövlətin gələcək perspektivlərini və milli maraqları bir araya gətirən qüvvə kimi doğuldu.Yeni Azərbaycan Partiyasının yaranmasına gətirən səbəblər 1990-cı illərin əvvəllərində Azərbaycanın içindən keçdiyi mürəkkəb tarixi şəraitlə sıx bağlıdır. Həmin dövrdə ölkədə siyasi və iqtisadi xaos hökm sürürdü. Ermənistanın hərbi təcavüzü Qarabağ münaqişəsinin daha da alovlanmasına gətirib çıxarmış, daxili siyasi qeyri-sabitlik isə ölkənin gələcəyini təhlükə altına almışdı. Bu ağır şəraitdə xalqın etimad bəslədiyi liderə, möhkəm dayağa ehtiyacı vardı.1992-ci ildə 91 nəfər tanınmış ziyalı – tarixdə “91-lər” kimi tanınan vətənpərvər şəxslər – Heydər Əliyevə müraciət edərək Azərbaycanın bu ağır vəziyyətdən çıxarılması üçün onun siyasi arenaya qayıtmasını istədilər. Onların təşəbbüsü ilə Naxçıvanda Yeni Azərbaycan Partiyasının təsis konfransı keçirildi. Bu konfransda Heydər Əliyev partiyanın sədri seçildi və bu addım ölkəmizin müstəqillik yolunda güclü bir təməl yaratdı.Ümumilli lider Heydər Əliyev, geniş siyasi təcrübəsi, dərin zəkası və xalq arasındakı yüksək nüfuzu ilə Yeni Azərbaycan Partiyasını qısa müddət ərzində Azərbaycanın ən güclü siyasi qüvvəsinə çevirdi. Partiyanın proqramı milli maraqlara xidmət etməyi, dövlətçilik ənənələrini qorumağı və Azərbaycanı müasir dünyada layiqli mövqeyə gətirməyi hədəfləyirdi. Onun rəhbərliyi ilə Yeni Azərbaycan Partiyası , ölkədə sabitliyin təmin edilməsində, iqtisadi islahatların həyata keçirilməsində və müstəqilliyin möhkəmləndirilməsində əsas rol oynadı. 2003-cü ildə Prezident İlham Əliyev Ümumilli lider Heydər Əliyev yolunu davam etdirərək Yeni Azərbaycan Partiyasına yeni nəfəs gətirdi. Onun rəhbərliyi altında partiya dövlətçilik prinsiplərinə sadiq qalaraq müasir inkişaf strategiyalarını həyata keçirdi. İlham Əliyevin rəhbərliyi dövründə Yeni Azərbaycan Partiyası təkcə Azərbaycanın daxilində deyil, beynəlxalq səviyyədə də öz mövqeyini möhkəmləndirdi. Partiya, ölkənin sosial-iqtisadi inkişafında, beynəlxalq əlaqələrinin genişlənməsində və Qarabağ münaqişəsinin ədalətli həlli istiqamətində mühüm uğurlara imza atdı.Bu gün Yeni Azərbaycan Partiyası, Azərbaycanın ərazi bütövlüyünün təmin olunmasında və Qarabağın işğaldan azad edilməsi ilə bağlı şanlı tariximizin yazılmasında da əhəmiyyətli rol oynayıb. Partiyanın gücü xalqın dəstəyində, ideyalarının möhkəmliyində və liderlərinin uzaqgörən siyasətindədir. Prezident İlham Əliyevin rəhbərliyi ilə Yeni Azərbaycan Partiyası, Azərbaycanı regionun lider dövlətinə çevirərək, ölkəmizin inkişafında davamlı töhfələr verir. Yeni Azərbaycan Partiyasının yaranması, inkişafı və bu günə qədər əldə etdiyi uğurlar Azərbaycan xalqının birlik və həmrəylik nümunəsi kimi tarixə düşüb. Bu, yalnız bir siyasi partiyanın hekayəsi deyil, həm də xalqın öz gələcəyini qurmaq iradəsi və dövlətçilik ənənələrinə olan inamının ifadəsidir.
Sahil Əliyev,
YAP-ın gənc fəalı
