Münaqişədən sonrakı mərhələ dövlətlər üçün təhlükəsizliyin möhkəmləndirilməsi, iqtisadi əlaqələrin bərpası və davamlı sülhün qurulması baxımından mühüm dövrdür. Azərbaycanın ərazi bütövlüyünü və dövlət suverenliyini bərpa etməsi ölkənin gələcək inkişafı üçün yeni şərait yaradıb. AQEM-in 7-ci Zirvə Görüşündə Prezident İlham Əliyevin çıxışı bu tarixi mərhələnin siyasi və regional əhəmiyyətini beynəlxalq auditoriyaya çatdırdı.
Azərbaycan uzun illər işğal nəticəsində ciddi humanitar və sosial problemlərlə üzləşmişdi. Təxminən bir milyon azərbaycanlının doğma yurdlarından didərgin düşməsi və yaşayış məntəqələrinin dağıdılması münaqişənin ağır nəticələrini göstərirdi. Prezident İlham Əliyev beynəlxalq hüququn pozulması və BMT Təhlükəsizlik Şurasının qətnamələrinin icra olunmaması məsələlərini xatırladaraq münaqişənin tarixi səbəblərinə diqqət çəkdi.
2020-ci ildə Vətən müharibəsi nəticəsində Azərbaycanın ərazilərinin böyük hissəsi işğaldan azad edildi. 2023-cü ilin sentyabrında dövlət suverenliyinin tam bərpası ölkənin müasir tarixində mühüm mərhələ oldu. Bu nəticələrdən sonra əsas vəzifələrdən biri sülhün möhkəmləndirilməsi və regionda gələcək əməkdaşlıq üçün əlverişli mühitin yaradılmasıdır.
Prezident İlham Əliyev çıxışında Azərbaycanın Ermənistana sülh təklif etdiyini və qisas siyasəti yürütmədiyini bildirdi. Bu yanaşma münaqişədən sonrakı münasibətlərin yeni prinsiplər əsasında qurulması üçün siyasi əsas yaradır. Sülhün davamlı olması üçün qarşılıqlı suverenliyə hörmət, öhdəliklərin yerinə yetirilməsi və dialoqun davam etdirilməsi vacibdir.
Azərbaycanın münaqişədən sonrakı inkişaf imkanları regional nəqliyyat, ticarət, enerji və humanitar əlaqələrin genişlənməsi ilə də bağlıdır. Prezident İlham Əliyevin AQEM tribunasından səsləndirdiyi fikirlər ölkəmizin sülh və əməkdaşlıq perspektivlərinə verdiyi əhəmiyyəti göstərdi. Regionda sabitliyin möhkəmlənməsi dövlətlər üçün iqtisadi inkişaf və qarşılıqlı faydalı tərəfdaşlıq imkanlarını artıra bilər.
Nəzrin Həsənli,
YAP Nizami rayon təşkilatının fəalı
