2025-ci il dekabrın 8-də Prezident İlham Əliyevin Slovakiyaya rəsmi səfəri iki ölkə arasında münasibətlərdə yeni mərhələ açmaqla yanaşı, Azərbaycanın uzunmüddətli xarici siyasət strateji kursunun aydın konturlarını bir daha ortaya qoydu. Bratislavada – Slovakiya Prezidenti ilə keçirilən görüşdən sonra mətbuata verilən bəyanat zamanı dövlət başçısının səsləndirdiyi “Azərbaycan öz xarici siyasət prioritetlərini çoxdan müəyyən edib” fikri həm ölkənin mövcud kursunu, həm də gələcək geosiyasi istiqamətlərini şərh edən əsas məqam kimi diqqət çəkdi.
Bu ifadənin mahiyyəti ilk növbədə ondan ibarətdir ki, Azərbaycan dəyişkən qlobal siyasət fonunda situativ mövqe tutmur; əksinə, uzunmüddətli, dəqiq və praqmatik strategiyaya əsaslanan siyasət yürüdür. Bu siyasətin başlıca istiqamətlərindən biri enerji təhlükəsizliyi və enerji əməkdaşlığıdır. Azərbaycan artıq illərdir Avropanın etibarlı enerji tərəfdaşına çevrilib və Slovakiya ilə dialoqun mühüm hissəsini də məhz bu sahədə əlaqələrin genişləndirilməsi təşkil edir. Prezidentin vurğuladığı kimi, ölkəmiz qaz ixracının coğrafiyasını genişləndirərək Avropanın enerji təchizatında sabitlik yaradan qüdrətli tərəfdaş statusunu möhkəmləndirib.
Xarici siyasətin digər strateji dayağı nəqliyyat və logistika sahəsidir. İlham Əliyev bəyanatında Azərbaycanın Şərq ilə Qərb arasında körpü rolunu daim gücləndirdiyini qeyd etdi. Son illərdə infrastruktur layihələrinə böyük həcmdə investisiya qoyulması nəticəsində Azərbaycan Mərkəzi Asiya ilə Avropa arasında ən etibarlı və təhlükəsiz tranzit marşrutlardan biri kimi formalaşmışdır. Slovakiya kimi Avropa ölkələri üçün bu dəhlizlər təkcə iqtisadi fayda deyil, həm də enerji və ticarət təhlükəsizliyinin vacib elementidir.
Səfər zamanı müzakirə olunan məsələlərdən biri də müdafiə-sənaye və texnoloji sahələrdə əməkdaşlıq idi. Bu istiqamət yalnız hərbi əməkdaşlıq anlamı daşımır; yüksək texnologiyaların tətbiqi, sənaye istehsalı və innovasiyaların bölüşdürülməsi kimi geniş platformanı əhatə edir. Azərbaycanın regional sabitlik, modernizasiya və post-münaqişə dövrünün yenidənqurma strategiyası məhz bu texnoloji tərəfdaşlıqları zəruri edir.
Prezidentin bəyanatındakı prioritetlərin üçüncü əsas sütunu çoxvektorlu diplomatiyadır. Azərbaycan son illərdə həm Qafqaz regionunda, həm Mərkəzi Asiyada, həm də Avropada balanslı siyasət yürüdür. Bu siyasət ölkəyə müxtəlif siyasi bloklar arasında tarazlığı qorumaq, qarşılıqlı faydalı əməkdaşlıq formatları yaratmaq imkanı verir. Slovakiya kimi müstəqil mövqeli ölkələrlə münasibətlərin dərinləşməsi də məhz bu çoxşaxəli diplomatiyanın nəticəsidir.
Nəticə etibarilə, İlham Əliyevin Bratislavada səsləndirdiyi “Azərbaycan öz xarici siyasət prioritetlərini çoxdan müəyyən edib” bəyanatı təsadüfi ifadə deyil. Bu, Azərbaycan dövlətinin uzun müddət ərzində formalaşdırdığı, milli maraqlara əsaslanan, regional və qlobal proseslərdə aktiv iştirakını təmin edən strateji xəttin rəsmi təsdiqidir. Slovakiya səfəri isə həmin prioritetlərin praktiki müstəvidə reallaşdırılmasına yönəlmiş növbəti addım oldu. Bu səfər həm iki ölkə arasında əlaqələri möhkəmləndirdi, həm də Azərbaycanın beynəlxalq aləmdə artan çəkisinin bir daha nümayişinə çevrildi.
Günel Əbdürəhmanova,
Yeni Azərbaycan Partiyası, məsləhətçi
