Azərbaycan bayrağı – göy, qırmızı və yaşıl rənglərdən ibarət olan üçrəngli bayraq, üzərində ağ aypara və səkkizguşəli ulduz təsvir olunmuşdur. Bu bayraq Azərbaycan xalqının azadlıq və müstəqillik simvolu olmaqla yanaşı, zəngin tarixi keçmişə malikdir. Hər bir rəngi, hər bir simvolu xalqımızın mübarizəsini, inamını və dəyərlərini əks etdirir.
Bayrağımızın ilk dəfə qəbul edilməsi 1918-ci ilə təsadüf edir. Azərbaycan Xalq Cümhuriyyəti yaradıldıqdan sonra milli rəmzlərin, o cümlədən bayrağın təsdiq olunması zərurəti yarandı. Müxtəlif variantlar müzakirə olunduqdan sonra, nəhayət, 9 noyabr 1918-ci ildə Azərbaycan Xalq Cümhuriyyətinin Nazirlər Şurası tərəfindən göy, qırmızı və yaşıl rənglərdən ibarət olan üçrəngli bayraq dövlət bayrağı kimi qəbul edildi.
Bu bayrağın rənglərinin hər biri dərin məna daşıyır. Göy rəng türkçülüyü, qırmızı rəng müasirliyi və inkişafı, yaşıl rəng isə islam dinini simvolizə edir. Aypara və səkkizguşəli ulduz isə islam mədəniyyətinin və türk xalqlarının birliyinin rəmzləridir.
Təəssüf ki, Azərbaycan Xalq Cümhuriyyətinin ömrü uzun olmadı. 1920-ci ildə sovet işğalı nəticəsində üçrəngli bayraq endirildi və yerinə oraq-çəkicli qırmızı bayraq asıldı. Lakin xalqımızın qəlbində azadlıq və müstəqillik rəmzi olaraq yaşamağa davam etdi.
Uzun illər boyu gizli saxlanılan, evlərdə qorunan üçrəngli bayraq, 1980-ci illərin sonlarında yenidən meydanlara çıxdı. Milli azadlıq hərəkatının simvoluna çevrilən bayraq, mitinqlərdə, nümayişlərdə dalğalandı, xalqımızın müstəqillik arzusunu ifadə etdi. 1990-cı ilin noyabrında Naxçıvan Muxtar Respublikası Ali Məclisinin sədri Heydər Əliyev tərəfindən Naxçıvanda dövlət bayrağı kimi qəbul edilməsi isə, müstəqilliyə doğru atılan mühüm addım oldu.
Nəhayət, 1991-ci il oktyabrın 18-də Azərbaycan Respublikası Ali Soveti “Azərbaycan Respublikasının Dövlət müstəqilliyi haqqında Konstitusiya Aktı”nı qəbul etdi və üçrəngli bayraq rəsmi olaraq dövlət bayrağı kimi təsdiq edildi. Bu tarixi gün xalqımızın yaddaşında əbədi olaraq qalacaqdır.
Müstəqillik illərində üçrəngli bayrağımızın şanlı tarixi yeni səhifələrlə zənginləşdi. İdman yarışlarında, beynəlxalq tədbirlərdə dalğalanan bayrağımız, Azərbaycanın adını bütün dünyaya tanıtdı. 2020-ci ildə Vətən müharibəsində qazanılan möhtəşəm qələbə isə bayrağımızı daha da ucaltdı. Şanlı ordumuzun rəşadəti sayəsində işğaldan azad edilən torpaqlarımızda dalğalanan üçrəngli bayraq, hər bir Azərbaycan vətəndaşı üçün qürur mənbəyinə çevrildi.
Qəhrəmanova Sevinc,
YAP-ın gənc fəalı
