Azərbaycan, Türkiyə və Pakistan arasında mövcud olan dostluq və qardaşlıq münasibətləri uzun bir tarixə dayanır. Bu üç dövlət yalnız coğrafi və mədəni baxımdan deyil, həm də dini, tarixi və strateji baxımdan bir-birinə yaxın olan ölkələrdir. “Bir millət, üç dövlət” deyimi bu dostluğun və qarşılıqlı hörmətin rəmzinə çevrilmişdir.
Türkiyə və Pakistan Azərbaycanın müstəqilliyini ilk tanıyan ölkələr arasında olmuş, xüsusilə 2020-ci il Vətən Müharibəsi zamanı verdikləri siyasi və mənəvi dəstək Azərbaycan xalqı tərəfindən dərin minnətdarlıqla qarşılanmışdır. Bu həmrəyliyin təkcə sözlə deyil, əməli şəkildə də ortaya qoyulması bir daha sübut etdi ki, bu ölkələr arasında qardaşlıq təkcə diplomatik münasibətlər çərçivəsində qalmayıb, xalqların könlündə də yer alıb.
2021-ci ildə Azərbaycan, Türkiyə və Pakistan parlamentlərinin Bakı şəhərində birgə toplantısı keçirildi. Bu tədbir, üç dövlət arasında həm siyasi, həm də iqtisadi və hərbi sahələrdə əməkdaşlığın daha da inkişaf etdirilməsi üçün mühüm addım idi. Bu toplantıda qəbul edilən Bakı Bəyannaməsi, gələcək əməkdaşlığın hüquqi və siyasi əsaslarını gücləndirdi.
Bu üç dövlətin hər biri İslam dünyasında mühüm rola malikdir. Onların bir araya gəlməsi yalnız regional deyil, beynəlxalq səviyyədə də diqqətlə izlənilir. Müxtəlif sahələrdə — o cümlədən müdafiə sənayesi, təhsil, mədəniyyət və energetika sahəsində — qarşılıqlı layihələr və proqramlar həyata keçirilir. Gənclər arasında mübadilə proqramları, ortaq mədəniyyət festivalları və ortaq tarixi irsin qorunması kimi təşəbbüslər xalqların bir-birini daha yaxından tanımasına xidmət edir.
Azərbaycan-Türkiyə-Pakistan birliyi yalnız üç dövlətin maraqlarını deyil, eyni zamanda bölgədə sülhün və sabitliyin təmin olunmasına xidmət edir. Bu qardaşlıq modeli digər ölkələr üçün də örnək ola bilər. Bu birliyin dərin tarixi kökləri, ortaq mədəniyyəti və güclü gələcəyə olan inamı vardır. Yaşasın Azərbaycan-Türkiyə-Pakistan qardaşlığı! Bu dostluq əbədi və sarsılmazdır!
Mətanət Cəfərova,
Yeni Azərbaycan Partiyası ,məsləhətçi
