Ölkənin beynəlxalq arenada qazandığı uğurlu təcrübəni paylaşan Prezident Əliyev Azərbaycanın iqtisadi və geosiyasi əhəmiyyətini qeyd etdi. Azərbaycanın müxtəlif ölkələrlə əməkdaşlıq çərçivəsində həyata keçirdiyi layihələr və diplomatik yanaşmalar ölkənin qlobal miqyasda etibarlı tərəfdaş kimi tanınmasını təmin edib. Bu təcrübə, Azərbaycanın BRICS+ platformasında da əməkdaşlığın daha da inkişaf etdirilməsinə töhfə verə biləcəyini göstərir. Azərbaycanın strateji yerləşməsinin yaratdığı üstünlüklərə toxunan Prezident Əliyev, ölkənin bölgənin əsas logistika mərkəzlərindən biri kimi fəaliyyət göstərdiyini vurğuladı. “Şərq-Qərb” və “Şimal-Cənub” nəqliyyat dəhlizləri Azərbaycanın ərazisindən keçir və bu dəhlizlər ölkənin nəqliyyat və logistika sektorunda müstəsna rol oynadığını nümayiş etdirir. Azərbaycan bu dəhlizlərin inkişafında fəal iştirak edir və qlobal ticarət axınlarının optimallaşdırılması üçün əhəmiyyətli töhfələr verir. Azərbaycan həm regional, həm də beynəlxalq platformalarda hərtərəfli əməkdaşlıq təşəbbüslərinə dəstək verir.
Prezident İlham Əliyev çıxışında Azərbaycanın ekoloji davamlılığa verdiyi əhəmiyyətə də toxundu. O bildirdi ki, gələn ay Bakı şəhəri COP29 Beynəlxalq İqlim Konfransına ev sahibliyi edəcək. Bu tədbirin Azərbaycanda keçirilməsi, ölkənin iqlim dəyişikliyi və ətraf mühit məsələlərindəki qətiyyətli mövqeyini əks etdirir. Prezident Əliyev vurğuladı ki, Azərbaycan iqlim dəyişikliyi ilə mübarizədə qlobal səylərə qoşulmağa və bu istiqamətdə mühüm təşəbbüslər göstərməyə davam edir.
Prezident İlham Əliyevin Kazanda XVI BRICS Sammitinin “Outreach”/“BRICS+” formatında etdiyi çıxış ölkənin çoxtərəfli diplomatiya və regional əməkdaşlığa olan sadiqliyini bir daha nümayiş etdirib. Dövlət başçımız Azərbaycanın beynəlxalq arenada tərəfdaşlığa, sülhə və dayanıqlı inkişafa dair konkret töhfələrini vurğulayıb. Qeyd olunub ki, Azərbaycanın Qoşulmama Hərəkatına 2020-2023-cü illərdəki sədrlik dövrü çoxtərəfli diplomatiyanın əhəmiyyətini göstərən bir nümunə olunub. Bu dövrdə Azərbaycanın rəhbərliyi altında Hərəkatın institusional gücü artırılıb və ölkəmiz beynəlxalq münasibətlərdə daha fəal bir oyunçuya çevrilib. Bu təcrübə Azərbaycanın Asiya regionunda Qarşılıqlı Fəaliyyət və Etimad Tədbirləri üzrə Müşavirədəki sədrlik rolunda da öz əksini tapıb.
Sammit çərçivəsində Azərbaycan və Ermənistan liderləri arasında baş tutan görüş iki ölkə arasında sülhə nail olmaq yolunda əhəmiyyətli bir addım olaraq yadda qaldı. Görüşdə tərəflər sülh sazişi, sərhədlərin delimitasiyası və demarkasiyası məsələlərini müzakirə etdilər. Bu cür diplomatik addımlar Cənubi Qafqaz regionunda dayanıqlı sülh və sabitliyin təmin edilməsində vacib əhəmiyyət daşıyır. Prezident İlham Əliyevin BRICS+ platformasındakı çıxışı Azərbaycanın çoxtərəflilik, logistika və iqlim əməkdaşlığında lider rolunu vurğulayaraq ölkənin qlobal güc mərkəzi kimi inkişafını və təsirini artırdığını bir daha sübut edib.
Həsənova Səbinə,
YAP-ın fəalı
