Azərbaycan Respublikasının Prezidenti İlham Əliyev 26 avqust 2025-ci ildə ərəb dünyasının nüfuzlu media qurumlarından biri olan “Əl-Ərəbiyyə” telekanalına geniş müsahibə vermişdir. Dövlət başçısının çıxışı təkcə Azərbaycanın xarici siyasət prioritetlərini deyil, həm də regionda sülh, təhlükəsizlik və əməkdaşlıq naminə irəli sürdüyü strateji hədəfləri əks etdirirdi. Müsahibə zamanı Qarabağ münaqişəsinin yekun mərhələsi, sülh müqaviləsinin imzalanması, nəqliyyat dəhlizlərinin əhəmiyyəti, regional diplomatiya və beynəlxalq münasibətlər mövzuları ön plana çıxmışdır. Prezident İlham Əliyev müsahibədə vurğulamışdır ki, Azərbaycan və Ermənistan arasında Ağ Evdə imzalanan sənəd müharibənin və uzunmüddətli münaqişənin sonunu ifadə edir. Bu, Azərbaycan tərəfindən irəli sürülən sülh gündəliyinin məntiqi nəticəsidir. Lakin dövlət başçısı qeyd edib ki, rəsmi sülh sazişinin imzalanması üçün Ermənistanın konstitusiyasında ərazi iddialarına şərait yaradan müddəa ləğv olunmalıdır. Əgər bu dəyişiklik reallaşarsa, iki ölkə arasında tarixi bir sənədin imzalanması mümkün olacaq. Bu yanaşma Azərbaycanın sülh prosesində prinsipial və ardıcıl mövqeyini nümayiş etdirir. İlham Əliyev açıq şəkildə bəyan etdi ki, sülh yalnız kağız üzərində deyil, həm də real siyasi-hüquqi zəmin üzərində qurulmalıdır. Müsahibənin mühüm məqamlarından biri də Zəngəzur dəhlizi mövzusu idi. Prezidentin sözlərinə görə, bu nəqliyyat layihəsi təkcə Şərq-Qərb deyil, həm də Şimal-Cənub istiqamətində strateji marşrut rolunu oynayacaq. Nəticədə Rusiya, Azərbaycan, Ermənistan, Naxçıvan və İranı birləşdirən yeni tranzit xətti formalaşacaq. Dövlət başçısı bu layihəni “qalib-qalib ssenarisi” adlandıraraq qeyd etdi ki, Zəngəzur dəhlizi bütün region ölkələrinin iqtisadi və siyasi maraqlarına xidmət edəcək. Beləliklə, Azərbaycan həm özünün, həm də qonşu dövlətlərin inkişafına töhfə verəcək bir layihəni reallaşdırır. Prezident İlham Əliyev müsahibə zamanı Azərbaycanın regional diplomatiyada fəal rolunu da diqqətə çatdırdı. O, Türkiyə ilə İsrail arasında münasibətlərin normallaşmasında vasitəçi ola biləcəyini bildirdi. Bu təklif Azərbaycanın beynəlxalq nüfuzunun, etibarlı tərəfdaş imicinin və balanslı siyasətinin göstəricisi kimi dəyərləndirilə bilər. Azərbaycanın öz müharibə təcrübəsini, sülhə keçid yolunu və diplomatik bacarıqlarını paylaşmaq istəyi regionda yeni əməkdaşlıq formatlarının yaranmasına zəmin yaradır. Dövlət başçısı müsahibədə həm də beynəlxalq gündəmdəki mühüm mövzulara toxundu. O, Ukraynanın ərazi bütövlüyünü Azərbaycanın dəyişməz mövqeyi kimi təqdim etdi. İlham Əliyev bildirdi ki, Bakı Kiyevə müxtəlif sahələrdə – enerji, humanitar və maliyyə – dəstək göstərməkdə davam edir. Bu yanaşma Azərbaycanın qlobal siyasətdə prinsipial mövqe tutduğunu, beynəlxalq hüquqa və dövlətlərin suverenliyinə hörmətlə yanaşdığını nümayiş etdirir. Prezident İlham Əliyevin “Əl-Ərəbiyyə” telekanalına müsahibəsi, əslində, Azərbaycanın yeni dövrdəki strateji xəritəsini nümayiş etdirdi. Prezident İlham Əliyevin bu müsahibəsi yalnız Azərbaycanın milli maraqlarını deyil, həm də Cənubi Qafqazda sülhün, əməkdaşlığın və sabitliyin təmin olunmasına yönələn ümumi strateji vizionu ortaya qoyur.
Məmmədova Nərmin
Yeni Azərbaycan Partiyası məsləhətçi
