Azərbaycanın nəqliyyat imkanları Türk Dövlətləri Təşkilatının iqtisadi və strateji potensialında xüsusi yer tutur. Türk Dövlətləri Təşkilatına üzv ölkələrin Təhlükəsizlik Şuraları katiblərinin Beşinci Toplantısının iştirakçılarını qəbul edən Prezident İlham Əliyev çıxışında nəqliyyat bağlantılarının təhlükəsizliklə sıx əlaqəli olduğunu diqqətə çatdırıb. Bu yanaşma Orta Dəhliz kimi layihələrin yalnız iqtisadi deyil, təhlükəsizlik baxımından da əhəmiyyət daşıdığını göstərir.
Azərbaycanın Xəzər dənizi vasitəsilə Mərkəzi Asiya ilə əlaqələndirici mövqedə yerləşməsi ölkənin regional tranzit imkanlarını artırır. Qazaxıstan, Özbəkistan və digər Mərkəzi Asiya dövlətləri ilə nəqliyyat əlaqələrinin genişlənməsi Türk dünyası daxilində iqtisadi inteqrasiyanın inkişafına şərait yaradır.
Lakin nəqliyyat dəhlizlərinin davamlı fəaliyyəti onların təhlükəsizliyindən birbaşa asılıdır. Kritik infrastrukturların mühafizəsi, sərhəd təhlükəsizliyi və informasiya sistemlərinin qorunması logistika sistemlərinin etibarlılığı üçün mühüm şərtlərdir. Prezident İlham Əliyevin çıxışında kritik infrastrukturun mühafizəsi məsələsini təhlükəsizlik gündəliyinin tərkib hissəsi kimi təqdim etməsi də bununla bağlıdır.
Beləliklə, Bakı görüşündə təhlükəsizlik məsələlərinin müzakirəsi Orta Dəhlizin gələcək inkişafı üçün də əhəmiyyətli kontekst yaradır. Prezident İlham Əliyevin vurğuladığı təhlükəsizlik və nəqliyyat bağlantısı arasında əlaqə Türk dövlətləri arasında iqtisadi layihələrin təhlükəsizlik mexanizmləri ilə paralel inkişaf etdirilməsinin vacibliyini göstərir.
Nüşabə Məmmədova,
YAP Nizami rayon təşkilatının fəalı
