Azərbaycan Respublikası, coğrafi mövqeyinə və tarixi irsinə uyğun olaraq, qlobal sülh və mədəniyyətlərarası dialoq mərkəzi kimi beynəlxalq nüfuzunu qoruyub saxlamaqdadır. Sentyabrın 15-də Azərbaycan Prezidenti İlham Əliyevin Bakıda keçirdiyi mühüm qəbul, ölkəmizin bu missiyasının davamlılığını bir daha təsdiq etdi. Dövlət başçısı Türk Dövlətləri Təşkilatının (TDT) Müsəlman Dini Rəhbərləri Şurasının 7-ci toplantısının, Yəhya Bakuvi Beynəlxalq Konfransının həmtəşkilatçılarının və Qafqaz Xalqları Ali Dini Şurasının üzvlərindən ibarət nümayəndə heyətini qəbul edərək, regional qardaşlığı daha da möhkəmləndirdi. Türkiyə, Özbəkistan, Qazaxıstan kimi qardaş ölkələrin və Şimali Qafqazın ali dini rəhbərlərinin iştirakı ilə baş tutan bu görüş, Prezident İlham Əliyevin rəhbərliyi altında Azərbaycanın həm Türk, həm də İslam dünyasında qarşılıqlı hörmətə və birliyə əsaslanan əməkdaşlığın inkişafında oynadığı aparıcı rolu nümayiş etdirdi. O, bu cür toplantıların mənəvi həmrəyliyi təşviq etdiyini və qlobal miqyasda sülh mesajı kimi çıxış etdiyini qonaqların diqqətinə çatdırdı.
Görüşdə Azərbaycanın dərin mədəni və fəlsəfi köklərinə toxunan Prezident İlham Əliyev, xalqımızın dünya mədəniyyəti xəzinəsinə verdiyi töhfələrdən fəxrlə danışdı. O, TDT-nin dini rəhbərlərinin Zirvə toplantısı ilə eyni vaxtda mütəfəkkir Seyid Yəhya Bakuviyə həsr olunmuş konfransın keçirilməsinin tarixi məna daşıdığını vurğuladı. Nizami Gəncəvi, İmadəddin Nəsimi, Şah İsmayıl Xətai və Məhəmməd Füzuli kimi dahilərin irsinin yalnız Azərbaycanın yox, bütün İslam aləminin ortaq sərvəti olduğunu bildirən dövlət başçısı, ölkəmizin tarixi coğrafiyasından da bəhs etdi. O qeyd etdi ki, Qafqaz Albaniyasının və Atabəylər dövlətinin mövcud olduğu bu torpaqlar tarixən Qafqaz və Türk dünyasını bir-birinə bağlamışdır və TDT daxilində yeganə Qafqaz ölkəsi kimi Azərbaycan bu vacib birləşdirici rolu bu gün də qürurla yerinə yetirir.
İslam dünyasında müşahidə olunan mürəkkəb siyasi proseslərə və kənar təsirlərə diqqət çəkən Prezident İlham Əliyev, müsəlman ümmətinin həmrəyliyinin həyati əhəmiyyətini xüsusi vurğuladı. O bildirdi ki, Azərbaycan İslam ölkələri arasındakı qardaşlığı yalnız bəyanatlarla deyil, atdığı əməli addımlarla dəstəkləyir. 2017-ci ildə Bakıda böyük müvəffəqiyyətlə keçirilmiş IV İslam Həmrəylik Oyunlarının birlik və qardaşlıq nümayişi olduğunu xatırladan dövlət başçısı, gələn il ölkəmizdə keçiriləcək İƏT Zirvə Görüşünün bu siyasətin məntiqi davamı olacağını bildirdi. Prezident İlham Əliyev qətiyyətlə vurğuladı ki, İslam dininə kənardan vurulmaq istənilən zərbələrin və yaradılan süni ixtilafların qarşısı yalnız müsəlman dövlətlərinin və xalqlarının ziddiyyətləri bir kənara qoyaraq vahid, güclü bir ailə kimi birləşməsi nəticəsində alına bilər.
Tarixi ədalətin bərpası və Qarabağın dirçəlişi məsələsi Prezident İlham Əliyevin çıxışının ən təsirli və qürurverici hissəsi oldu. Qonaqların Qarabağa – Ağdam, Xankəndi, Xocalı və Şuşaya edəcəyi səfərə toxunan dövlət başçısı, Ermənistanın 30 illik işğalı dövründə 65 məscidin yerlə-yeksan edilməsini və müqəddəs yerlərimizdə heyvan saxlanılmasını bütün İslam sivilizasiyasına qarşı törədilmiş böyük həqarət kimi xarakterizə etdi. Buna rəğmən, qürurla bildirdi ki, Azərbaycan xalqı rəşadətli Ordusu ilə, hərbi güc və qəhrəmanlıq nümayiş etdirərək tarixi ədaləti özü bərpa etmişdir. Bu gün “Böyük Qayıdış” proqramı çərçivəsində azad edilmiş bölgələrdə 90 mindən çox insanın yenidən məskunlaşması, Prezident İlham Əliyevin rəhbərliyi ilə Azərbaycan dövlətinin qurucu qüdrətini və xalqımızın mütləq Zəfərini bütün dünyaya əyani şəkildə sübut edir.
Elnarə Hümmətova,
YAP Nizami rayon təşkilatının “Naxçıvanski küçəsi, 43a” ərazi partiya təşkilatının sədr müavini
