Qlobal və regional təhlükəsizliyin, eləcə də sivilizasiyalararası dialoqun təmin olunmasında Azərbaycanın oynadığı mühüm rol beynəlxalq ictimaiyyət tərəfindən yüksək qiymətləndirilir. Sentyabrın 15-də Prezident İlham Əliyevin Bakıda təşkil edilən görüşü bu qlobal etimadın növbəti göstəricisi idi. Dövlət başçısı Türk Dövlətləri Təşkilatının (TDT) Müsəlman Dini Rəhbərləri Şurasının 7-ci toplantısı, Yəhya Bakuvi Beynəlxalq Konfransının həmtəşkilatçıları və Qafqaz Xalqları Ali Dini Şurasının üzvlərindən ibarət nümayəndə heyətini qəbul edərək, ölkəmizin xarici siyasətində mənəvi dəyərlərə verilən yüksək önəmi bir daha nümayiş etdirdi. TDT-nin Baş katibinin, Mərkəzi Asiya, Türkiyə və Qafqaz ölkələrinin nüfuzlu din xadimlərinin qatıldığı bu qəbul, Prezident İlham Əliyevin liderliyi ilə Azərbaycanın İslam və Türk dünyasında barışdırıcı, birləşdirici və uzlaşdırıcı qüvvə olduğunu birmənalı şəkildə təsdiqlədi.
Görüşdə iştirakçılara müraciət edən Prezident İlham Əliyev ölkəmizin dərin tarixi və fəlsəfi köklərinə ekskurs edərək, mədəniyyətimizin zənginliyindən danışdı. O, TDT çərçivəsində dini rəhbərlərin toplantısı ilə yanaşı, Seyid Yəhya Bakuviyə həsr edilmiş konfransın eyni zamanda keçirilməsinin əhəmiyyətini vurğuladı. Azərbaycanın yalnız iqtisadi və hərbi qüdrəti ilə deyil, həm də Nizami, Nəsimi, Xətai və Füzuli kimi dahilərin yaratdığı mənəvi irsi ilə öyündüyünü bildirən dövlət başçısı, bu şəxsiyyətlərin bəşəriyyətə, o cümlədən bütün İslam aləminə işıq tutduğunu xatırlatdı. O, qədim Qəbələ və Naxçıvanın tarixi əhəmiyyətinə toxunaraq, TDT daxilində yeganə Qafqaz ölkəsi olan Azərbaycanın bu iki böyük coğrafi məkan arasında hər zaman qırılmaz bir körpü funksiyasını yerinə yetirdiyini bəyan etdi.
İslam coğrafiyasında baş verən bugünkü ziddiyyətlər və çağırışlar fonunda Prezident İlham Əliyev həmrəyliyin həyati zərurət olduğunu qonaqların diqqətinə çatdırdı. O, müsəlman ölkələrinin din xadimlərinin birgə fəaliyyətinin və onların sülhə yönəlmiş fikirlərinin cəmiyyətdə nə dərəcədə böyük müsbət rezonans doğurduğunu vurğuladı. Prezident bildirdi ki, Azərbaycan İslam Əməkdaşlıq Təşkilatı daxilində daim sülh və əməkdaşlıq tərəfdarı kimi çıxış edir və 2017-ci ildə Bakıda təşkil edilən IV İslam Həmrəylik Oyunları məhz bu birliyin bariz təzahürü idi. Gələn il ölkəmizin ev sahibliyi edəcəyi İƏT Zirvə Görüşünə böyük inam bəsləyən dövlət başçısı, bu tarixi tədbirin müsəlman dünyasını parçalamağa çalışan qüvvələrə ən tutarlı cavab olacağına və İslam ümmətini daha da sıx birləşdirəcəyinə əminliyini ifadə etdi.
Prezident İlham Əliyevin çıxışının yekun hissəsi Qarabağın azadlığı və dirçəlişi kimi qürurverici bir mövzuya həsr olunmuşdu. Dini rəhbərlərin işğaldan azad olunmuş ərazilərə edəcəyi səfərə toxunan dövlət başçısı, Ermənistanın 30 illik işğalı dövründə 65 məscidin yerlə-yeksan edildiyini və İslam məbədlərinin hiddətamiz şəkildə təhqir olunduğunu xatırlatdı. Prezident qətiyyətlə vurğuladı ki, dünyada beynəlxalq hüququn zəiflədiyi və “güclü olan haqlıdır” prinsipinin işlədiyi bir dövrdə, Azərbaycan xalqı rəşadətli Ordusunun hesabına öz ədalətli mövqeyini bərpa etdi. Artıq Qarabağ və Şərqi Zəngəzura 90 mindən çox insanın köçürüldüyünü qeyd edən dövlət başçısı, Prezident İlham Əliyev siyasətinin qalibiyyət simvolu olan “Böyük Qayıdış” layihəsinin uğurla icra edildiyini və Müzəffər Azərbaycanın sürətli quruculuq mərhələsini qürurla davam etdirdiyini bütün dünyaya bəyan etdi.
Lətifə Nəsirova,
YAP Nizami rayon təşkilatının “Keşlə qəsəbəsi, Sabir küçəsi, 61” ərazi partiya təşkilatının sədr müavini
