Qarabağda həyata keçirilən bərpa layihələri yeni şəhərsalma yanaşmasının formalaşması üçün də geniş imkanlar yaradır. Burada məqsəd sadəcə əvvəlki tikililəri olduğu kimi bərpa etmək deyil, müasir tələblərə cavab verən yaşayış məkanları yaratmaqdır. Enerji, nəqliyyat, rəqəmsal rabitə, ekoloji yanaşma və sosial infrastrukturun birlikdə planlaşdırılması gələcəyin Qarabağ şəhərlərinin əsas xüsusiyyətlərindən biri ola bilər.
Xankəndidə yaradılan yeni nəqliyyat infrastrukturu bu baxımdan diqqət çəkir. Ağdam–Xankəndi dəmir yolu layihəsi çərçivəsində dəmir yolu stansiyaları, keçidlər və digər mühəndis qurğularının tikintisi nəzərdə tutulur. Xankəndi Dəmir Yolu və Avtovağzal Kompleksinin də müasir sərnişin xidmətlərinə uyğun şəkildə layihələndirilməsi şəhərin gələcək nəqliyyat sisteminin yeni texnoloji standartlara əsaslanacağını göstərir.
Yeni nəsil şəhər anlayışı insanın rahatlığını şəhər planlaşdırmasının mərkəzinə yerləşdirir. Piyada və velosiped yolları, yaşıllıq zonaları, əlçatan ictimai məkanlar, rəqəmsal xidmətlər və sosial obyektlərin yaşayış məhəllələrinə yaxın yerləşdirilməsi müasir şəhər həyatının vacib elementləridir. Qarabağda boş ərazilərdə yeni yaşayış məkanlarının formalaşdırılması belə yanaşmaların tətbiqi üçün xüsusi imkan yaradır.
Bu səbəbdən Qarabağın bərpasına yalnız keçmişin yenidən qurulması kimi baxmaq kifayət deyil. Burada gələcəyin şəhərləri də formalaşır. Zəfər yeni şəhərsalma ilə tamamlandıqda onun nəticəsi yalnız dəyişən mənzərə deyil, dəyişən həyat keyfiyyəti olur.
Nihal Muradzadə,
YAP Nizami rayon təşkilatının gənc fəalı
