Qarabağda yeni həyatın uzunmüddətli perspektivi gənclərin regionda yaşaması, təhsil alması, işləməsi və ictimai həyata qoşulması ilə sıx bağlıdır. Yeni şəhərlərin qurulması gənclər üçün də yeni imkanlar yaradır. Müasir məktəblər, rəqəmsal infrastruktur, idman obyektləri, mədəniyyət mərkəzləri və yeni iş yerləri gənc nəslin regionla bağlılığının güclənməsinə xidmət edə bilər.
Gənclərin Qarabağın inkişafında iştirakı yalnız əmək bazarı ilə məhdudlaşmamalıdır. Onlar şəhərlərin ictimai həyatının, mədəni layihələrin, könüllülük fəaliyyətinin və innovativ təşəbbüslərin iştirakçılarına çevrilə bilərlər. Yeni qurulan şəhərlərin müasir texnologiyalarla təmin olunması isə xüsusilə gənclər üçün rəqəmsal və innovativ fəaliyyət imkanlarını genişləndirə bilər.
Qarabağda böyüyən yeni nəsil həmin ərazilərin gələcək simasını müəyyən edəcək. Bu gün məktəbə gedən uşaq sabah mühəndis, müəllim, həkim, sahibkar və ya dövlət qulluqçusu kimi öz doğma şəhərinin inkişafında iştirak edə bilər. Buna görə təhsilə, peşə hazırlığına və gənclərin sosial inkişafına qoyulan sərmayə Qarabağın gələcəyinə qoyulan sərmayədir.
Böyük Qayıdışın davamlılığı üçün Qarabağın gənclər üçün cəlbedici yaşayış və inkişaf məkanına çevrilməsi mühüm məsələdir. Burada onlar yalnız yaşamaq deyil, öz gələcəklərini qurmaq imkanına malik olmalıdırlar. Qarabağın sabahını bu gün tikilən binalar qədər həmin binalarda böyüyəcək və gələcəkdə onları idarə edəcək gənclər müəyyən edəcək.
Eyyub Cumayev,
YAP Nizami rayon təşkilatının fəalı
