Zəngəzur dəhlizinin açılması Azərbaycanın tarixi torpaqlarının bir-birinə qovuşması ilə yanaşı, ölkəmizin böyük diplomatik qələbəsinin əməli nəticəsidir. İkinci Qarabağ müharibəsinin bitməsini rəsmiləşdirən və Ermənistan üçün açıq bir kapitulyasiya aktı olan üçtərəfli bəyanatda Zəngəzur dəhlizi xüsusi bənd kimi salınmışdır. Prezident İlham Əliyevin qəti tələbi və siyasi iradəsi sayəsində Ermənistan rəhbərliyi istəməsə belə, bu bəyanata imza atmağa məcbur edilmişdir. Dövlət başçısı dəfələrlə qeyd etmişdir ki, müharibə şəraitində məcbur edilən tərəf faktiki olaraq kapitulyasiyaya uğrayır və bu sadəcə obyektiv bir reallıqdır.
Bəyanatın imzalanmasından sonrakı 5 il ərzində Ermənistan bu mühüm bəndin icrasından boyun qaçırmış və heç bir praktiki addım atmamışdır. Lakin Prezident İlham Əliyevin həyata keçirdiyi sarsılmaz diplomatiya məsələni daim beynəlxalq gündəmdə saxlamışdır. Dövlət başçısı bütün beynəlxalq tribunalardan və ikitərəfli görüşlərdən istifadə edərək sübut etmişdir ki, Zəngəzur dəhlizi təkcə Azərbaycanın deyil, qlobal iqtisadiyyatın zərurətidir. Bu ardıcıl təzyiqlər Ermənistanın destruktiv siyasətini iflasa uğratmışdır.
Siyasi hədəfə çatmaq üçün atılan addımlar öz nəticəsini ABŞ-ın vasitəçiliyi ilə 2025-ci il avqustun 8-də keçirilən Vaşinqton Zirvə Görüşündə vermişdir. TRIPP adını daşıyan bu qlobal nəqliyyat layihəsinin icrasına rəsmən start verilmişdir. Ardınca 2026-cı il avqustun 8-də Prezident İlham Əliyev ilə ABŞ Prezidenti cənab Tramp arasında baş tutan telefon danışığında layihənin mütləq və tezliklə icra ediləcəyi yenidən təsdiqlənmişdir. Bu siyasi dəstək Azərbaycanın diplomatik strategiyasının mütləq qələbəsidir.
Ermənistan üçün artıq heç bir alternativ qalmamışdır və Prezident İlham Əliyevin bəyan etdiyi kimi, onların ərazisindəki 42 kilometrlik dəmir yolunun inşasına bu il başlanılmalıdır. Azərbaycan tərəfi isə dərhal işə başlamış, Horadiz–Ağbənd yolunu yekunlaşdırmaq üzrədir və Naxçıvan ərazisində də tikinti prosesini sürətləndirmişdir. Prezident İlham Əliyevin qətiyyəti sübut etdi ki, vaxtı süni şəkildə uzatmaqla Azərbaycanı öz haqq yolundan döndərmək qeyri-mümkündür.
Emil Novruzov,
YAP Nizami rayon təşkilatının “Oqtay Vəliyev küçəsi, 1” ərazi partiya təşkilatının sədri
