2025-ci ilin 25 sentyabr günü dünya dövlətlərinin liderləri Nyu-Yorkda, BMT Baş Assambleyasının 80-ci sessiyasında toplaşarkən, Azərbaycan Prezidenti İlham Əliyevin kürsüdən səsləndirdiyi nitq diqqətlərin mərkəzinə çevrildi. Bu çıxış sadəcə rəsmi bəyanat deyildi – o, həm tarixi bir yolun yekunu, həm də gələcək vizyonun bəyanı idi.
Prezident sözə Azərbaycanın son otuz ildə yaşadığı ən böyük ədalətsizlik – Ermənistanın işğalı faktı ilə başladı. O, beynəlxalq ictimaiyyətin gözləri qarşısında Azərbaycanın 20 faizə yaxın ərazisinin uzun illər boyu işğal altında qalmasını, yüz minlərlə insanın öz yurd-yuvasından didərgin düşməsini xatırlatdı. Bu xatırlatma sadəcə fakt deyildi, həm də beynəlxalq qurumların illərlə sərgilədiyi passiv mövqeyə ünvanlanan bir mesaj idi.
Daha sonra Prezident 2020-ci ilin Vətən müharibəsinə keçid etdi. O vurğuladı ki, Azərbaycan öz torpaqlarını beynəlxalq hüquqa əsaslanaraq, ədalətli və legitim şəkildə azad edib. Bu müharibə Azərbaycanın həm gücünü, həm də haqq işinə sadiqliyini dünyaya göstərdi. İlham Əliyev çıxışında xüsusilə Ermənistanın mülki şəhərlərə raket zərbələri endirdiyini, kasetli bombalardan istifadə etdiyini qeyd edərək, ikili standartlara diqqət çəkdi: “Niyə mülki insanlara qarşı törədilən bu cinayətlər illərlə dünya mediasında lazımınca işıqlandırılmadı?” – sualı hər bir nümayəndə heyətinə ünvanlanmış kimi səsləndi.
Prezident Əliyevin nitqində təkcə müharibədən sonra əldə edilən hərbi qələbə yox, həm də sülhün bərqərar olması üçün atılan addımlar ön plana çəkildi. O bildirdi ki, Azərbaycan qalib ölkə kimi revanş hissi ilə deyil, gələcəyi qurmaq niyyəti ilə hərəkət edir. Bu məqam, dünya liderlərinə ünvanlanan ən mühüm mesajlardan biri oldu: Qələbə ilə sülh bir-birini inkar edən deyil, tamamlayan anlayışlardır.
Çıxışın ən təsirli məqamlarından biri isə Prezidentin beynəlxalq qurumlara müraciəti idi. O, açıq şəkildə vurğuladı ki, BMT qətnamələrinin kağız üzərində qalması, işğal dövründə heç bir real mexanizmin işləməməsi beynəlxalq hüququn nüfuzuna böyük zərbə vurub. Bu sözlər, əslində, təkcə Azərbaycanla bağlı deyildi – bu, bütün münaqişə bölgələrində ədalət gözləyən xalqlar üçün bir çağırış idi.
Prezident Əliyevin çıxışı təkcə diplomatik mətn deyildi, o, milli qürurun və dövlətçilik prinsipiallığının ifadəsi idi. Nitqin hər sətirində Azərbaycan xalqının haqq yolunda göstərdiyi iradə, müstəqilliyini qorumaq uğrunda apardığı mübarizə duyulurdu.
Sonda isə dövlət başçısı gələcəyə dair vizyonunu açıqladı: regionda davamlı sülhün təmin olunması, əməkdaşlıq layihələrinin genişləndirilməsi, enerji və nəqliyyat dəhlizlərinin təhlükəsizliyinin qorunması Azərbaycanın əsas hədəfləri kimi təqdim olundu. Bu, həm də bir mesaj idi ki, Azərbaycan artıq münaqişələrdən əziyyət çəkən ölkə deyil, əksinə, regionun sabitlik və əməkdaşlıq mərkəzinə çevrilmək niyyətindədir.
Rəna Süleymanlı
Yeni Azərbaycan Partiyası, məsləhətçi
